dinsdag 5 december 2017

De groet'n van Hendrik

Ik binne gek op Kerst, al die mooie laampies buuten, de dikke kalkoene die op taofel kump, keersies, de lekkere luchies van al det etten wat oe de neuze dut kriebelen.Fennigje had ok al een lekkere kalkoene uut ezocht,

 en de rest van de bosschoppen lagen allemaole is de kelder. Ik hoeven alinnig maor af te wachten totdet et 24 december was
Maor et liep iets anders! Op 23 december belden Fennigjes vriegezelle zuster op, zie was evallen en konne niets beginnen, want zie had un pols ebreuken. Of Fennigje dan de volgende dag maar kon kom'n en as zie noe teeg'n de middaag'n kwam en dan de volgende dag met de laatste busse van 19.05 naor huus an ging, dan waar ik maar 1,5 dag allinig, det kon'k weh redden, ok al was et dan eerste'n kerstdag. Fennigje wol alles klaor zett'n, ok de kleer'n klaor legg'n veur eerste kerstdag umme naor de karke te gaon. Ik mosse allinig de  tiennagels neudig knippen, want die waar'n mie deur de sokken hen egruuit. Het was allemaole goed geregeld.
Ik hebbe de volgende dag Fennigje naor de busse ebracht en toen ha'k et riek veur mie allinig. Ik liep naor de kelder en haald'n daor de advocaot teveurschien, ach, ien glasie kon gien kwaod, ik zage lekkere gebakkies lig'n, van de gebraoden rollade kon'k wel een stukkie of haal'n en van de worst kon'k wel een stukkie of bieten. Zo he'k de hele avond an't smikkelen an ewest.
Ik konne mie best redden zo, maor ik binne weh zo misselijk as een katte naor bedde hen egaon.
De volgende morn bin ik opestaon en wolle de rommel effen in de container gooi'n, dus ik lope de veurdeure uut en gooi de zak weg en in ien keer heurde ik de buurvrouwe mien name roep'n. Betrapt! Want ik stunne nog op de blote voet'n in de piejama. Zie wus det Fennigje naor heur zuster was egaon en wol effen weet'n hoe et gunk.
En met dek heur vertel heurde ik un klap, vleug mie toch de deure in et slot. Ik kieke naor de deure, kieke de buurvrouwe an...... en ik konne weh janken van ellende.
Daor stun ik op kerstmorn op de blote voet'n in de piejama. De buurvrouwe kek mie an met grote oog'n van schrik en vreug of ik de achterdeure ook nog lus hadde. Niet dus.
En wat noe? Dan mos ik maor met haar metkom'n. Er zat ok niks anders op want Fennigje had een sluttel in de buse. Dus daor ginge wie op weg naor de buur'n. Et volgende probleem kon'k in de varte al an zien kom'n. Daor kwamen de mense an die naor de karke hen gingen. Ik dee maor net of de piejama mien nije pak was. Het was maor goed det Fennigje dit niet zag, dan hak op mien donder ekreeg'n.
Maor noe hak toch wel een ander probleem, zie kwam pas umme half achte terugge en wat mos ik? D'r zat niks anders op dan bie de buurvrouwe an te schoev'n. Zie kreeg straks de kienders op bezuuk en die bleem ok etten. En daor kwaam'n ze an, allemaole in de beste kleer'n en daor zat ik in de piejama te denken dek naor Fennigje hadde mutten luusteren en de tiennagels hadde mutten knippen, dus met het schaamrood op de kinnebakkes hek toch weh heerlijk zitten smikkelen van de kalkoene.
Umme half achte bin'k op de klomp'n van de buurman naor huus an ekuierd. Toen ik Fennigje het verhaal hadde verteld was het ienige wat zie zei: " Sukkel, ie kunt oe ok nooit niet allinig laot'n".
Al met al was't weer een mooi'n dag.
Wulle wens'n iederiene een hele fijne kerst en nemt de sleutel met ai naor buut'n hen gaot!
De groet'n,
Hendrik

Geen opmerkingen:

Een reactie posten